|
藉美股做好，港股周五有明顯支持，恒指高開後整日在高位徘徊，收市升350點，報21,829點，令全個星期埋單計數，轉跌為升，有76點或者0.35%進帳，恒指能夠輕微高於20日平均線21,829點收市（國企指數更是大幅拋離），如果下星期能夠重返21,953點阻力樓上，港股短期的調整，好大機會已經告一段落，史提芬仲有希望見得到今年的終極目標23,500點。
中國電腦業一哥聯想（00992），截至九月半年賺3,707萬美元，比○八年同期跌72.3%，拆開兩季計，第一季蝕掉1,601萬美元，第二季賺5,308萬美元，七至九月的確有長足之進。筆者留意到其第二季業績比唔少大行預測都要高，比較樂觀的德銀也只係估賺2,000萬美元，只可惜對股價幫助唔大，尋日開得高收day low，由高位4.6元回到前日的4.44元收市，最終是原地踏步。
個人電腦行業，今年下半年開始有改善，加上微軟Windows 7叫好叫座，業界估計過去一年的逆境，會在一○及一一年大逆轉，唯獨聯想股價今年累積升幅唔細，即使大行預測未來兩年由蝕變賺，預測盈利8,223萬美元及2.5億美元，市盈率已經去到63.6倍及20.5倍，估值唔算平，較大機會於未來半年至一年間，在4至5元內大玩回力球，只適合高沽低買炒波幅。
既然恒指逼近22,000點，要搵大落後股票難度也自然愈來愈高。藍籌中，撇開向來旺市無人吼的公用股，中移（00941）都算失威，年初到依家仲跌緊5%，筆者見唔少股民都煩惱緊，如斯田地，應沽貨轉追焦點股，抑或繼續守落去好？
智能手機消費增
常言道：多隻香爐多隻鬼。中移落後，主要係多兩家3G供應商加入血拚，大孖沙驚中移上客減慢，用戶消費被價格戰拖低。不過，最近對手聯通（00762）的iPhone月費開高，3G服務費大平賣並沒出現，筆者屬樂觀族，三家3G即使一齊投入服務，現時2G主導的每月每戶平均消費，再跌機會唔大，反而智能手機得到3G網絡發揮威力，一些中用量用戶增加數據瀏覽，網絡商收入結構重點，會由量變成質，上客或者減慢，可是消費增長可以彌補。
中移盈利由○四年417億元（人民幣．下同）到○八年賺1,128億元，複合式年增長近42%，未來兩年在推廣及新網絡折舊增加下，即使業績持平，11.5倍預期市盈率已屬近年谷底，充分反映短期缺乏增長。
中移市值1.48萬億港元，未來幾年每年最少由營運產生近2,000億元人民幣，從現金流量去看，估值有被低估之嫌，而人民幣收入，港元股價產生的每年3至4%匯兌好處，更唔使多講，「渣」貨者仲係乖乖等收成比較亂去高接火棒好。
|
