|
美鋁業績勝預期帶動下，尋日港股一度上破21,500點。大市再升，但市場氣氛依然麻麻，市場有炒味o既股份，計落認真唔多，而且有部分都係日升日跌，無太多連續性，咁o既氣氛完全唔似大市處於高位，尋日金管局又再注資，希望在新錢流入下，大市氣氛會有較大改善。
市場多有炒消息股，僑雄能源（00381）○七年以總代價8.4億元收購內蒙兩個煤礦，其中2.54億元係以可換股票據進行，但隨著海嘯湧至，僑雄股價亦大為縮水，集團剛決定將該批可換股票據行使價，由0.7元下調至0.25元。消息一出，該股股價亦有反應。古晨睇近兩日走勢，正正係營造緊旗形，估計應有動作跟尾，隨時會爆上，暫時以0.4元作為目標，以0.24元作為止蝕位。
古晨
|
