|
恒指昨日在有波幅無升幅下作結，微升6點報21,499點，但都總算升足五日，全個星期計，恒指累積1,124點，升幅5.5%。金管局連環承接美元沽盤，看來熱錢湧入情況仲未罷休，下星期港股站穩陣腳後，挑戰海嘯後高位21,929點機會唔細。
無意沾手潛水新股
睇番八月底至今，唔少新股潛水，利郎（01234）、匹克（01968）、中冶（01618）、現代傳播（00072）、恒盛（00845）、華南城（01668）及承達（02288），仍低過招股價介乎5.1%至41.4%，呢一批新股狂潮下，保薦人普遍定價比較高o既公司，幾時返到家鄉？只有天知曉，但筆者短期內絕對無興趣沾手。
一連幾日介紹受惠美元疲弱，資產價格走強的資產型公司，今日想再寫工業股，其中電腦周邊產業最令史提芬有興趣，最近統計機構Gartner公布，美國及亞洲市場開始重拾動力，個人電腦市場有復甦蹟象，第四季付運量出現正增長。
早前亦有大行調高一○至一二年電腦付運量，估計未來三年增長會介乎8至10%，一來海嘯的陰霾逐漸遠去，其次市場對微軟新作業系統Windows7，都抱有厚望，月內上市相信會有助硬件更新的需求。
筆者怕煩，唔想年年將個腦「鏟裝」，也對Vista有點抗拒，轉o左用對手「麥金多」一段日子，記得Vista上市前電腦股都炒過一輪，今次Windows7可以吸引用家換機？抑或像Vista一樣雷聲大雨點小？由近期一些Windows7預告，筆者傾向悲觀。不過，毫無疑問近年電腦在多媒體應用上，愈來愈普及，液晶顯示屏尺碼愈來愈大去配合功能，銷售表現也勝過電腦主機本身，令史提芬對顯示屏生產商更感興趣。
長城入股料有後著
心水股冠捷科技（00903），是全球最大液晶顯示屏及電視生產商，上半年全球電腦出貨量微跌，電腦用顯示屏亦然，但電視品牌商外判生產上升，頭六個月液晶電視付運量大升62.7%，去到340萬台，表現唔錯，而主要零部件LCD Panel價格比去年回落，上半年毛利率由4.9%擴闊到5.7%。
綜合大行預測，冠捷最壞時刻已過，○九年純利預測1.17億美元，較○八年的9,718萬美元，回升兩成，而一○及一一年估計跟隨整個電腦行業，提供大約一成年增長，估值亦唔算高；令人憧憬的，是信息產業部旗下的長城計算機，進身大股東後未有大動作，會否大舉進軍內銷市場，可能性不容抹殺。
|
