【明報專訊】警察唔鍾意被人叫「差人」,呢樣Emily有所聽聞,前「一哥」李明逵曾對記者講,「唔通我哋警察好差,要被喚作『差人』?」,因此近年官式場合已少了「差人」嘅稱謂。

救護員感叫法不被尊重

估唔到嘅係,救護人員亦唔鍾意救護車被人叫「白車」,話說港鐵近期播放一個主題為「鐵路司令」廣告,係有關港鐵職員如何應付突發事故,如孕婦喺列車內臨盆,有職員提到要叫「白車」嘅對白。近日網上「急救醫療交流區」有唔少救護界人士表達不滿,仲有人去信通訊局投訴,希望將「白車」嘅稱呼變成為歷史咁話。

通訊局噚日話,港鐵最近一輯廣告收到35宗投訴,Emily睇過該廣告,港鐵職員嘅對白,分別將救護車喚作「救護車」同埋「白車」。有救護員同Emily解釋,近年大家希望公眾喚「救護車」或「救護員」,對「白車」嘅叫法感到有啲不被尊重,所以先至有人投訴。

港鐵發言人話多謝有關意見,會向廣告代理反映,強調短片係希望突顯港鐵職員能力及工作,回應社會人士需要。