【明報專訊】「10點前特首」好快重現人間,拎咗數碼廣播牌照嘅香港數碼廣播有限公司,創辦人「大班」鄭經翰計劃喺12月開咪,頻道叫做「大聲台」。不過,Emily近排聽到有講法話大班個台最終係咪搞得成都仲係未知之數,話佢搞咗個台咁耐都未開,甚至有人話因為請人時未講實薪酬而搞到人腳唔齊。到底最後會唔會爛尾,年底就有分曉。

不過,大班噚日同Emily講到係威係勢,仲叫Emily到佢哋嘅辦公室參觀。

香港數碼廣播有限公司據聞搵咗一班主持班底,把聲好磁性嘅顏聯武同洪朝豐會負責夜晚節目,梁思浩亦會加盟,黎則奮就負責財經台。大班話,呢個月會開兩個音樂台,9月15日就會開財經台同跑馬台,至於自己擔正嘅大聲台就會喺12月開始。大班話啲錢同人已經陸續到位,個台一定開得成。