【明報專訊】嶺南大學公共管治研究部主任李彭廣兩年半前離開老家嶺大,轉投智經研究中心出任研究總監,但今年初辭工,重返嶺大。坊間有說,李彭廣之所以有此決定,全因佢喺智經工作得唔愉快,甚至有鬱鬱不得志之感咁話。不過,李彭廣日前親自向Emily否定謠言,仲親自破解重返嶺大之謎。

否認「鬱鬱不得志」謠言

李彭廣話,佢同嶺大簽嘅係長約,當日係以放無薪假嘅形式轉投智經,其實早已預咗自己重返嶺大嘅一日。佢直言,下年各大院校將面臨三三四新學制嘅挑戰,不少嶺大中人早已積極游說佢重返老家幫手,加上佢亦想坐低,好好組織自己手頭上嘅資料寫書,所以決定告別智經,絕對唔係好似坊間傳聞所言。

老李仲話,唔同工作崗位有唔同體驗,只要佢願意去做,就必定會有得着,自己一定唔會用「唔愉快」去形容過去兩年喺智經嘅工作。